Bule Masuk Kampung in Balinese language

Bule Masuk Kampung

Numbeg ring carik

Girang mekarya ring carik

Niki carik sane sampun metandur

Meme lan Bapa niki sane petani asli

Niki boyeje photo keambil pacang keanggen film-film sinetron, sakewanten niki photo mahasiswa saking Amerika sane rauh ke Bali santukan sanget keneh ipun melajahin budaya, basa, cara hidup lan kesenian sane wenten ring Bali. Para mahasiswa niki sedeng mekarya ring sawah ring Banjar Munduk Pakel, Tabanan, mangdane dane uning sapunapi rasane dados petani ring Bali.

“Eh, keweh pesan dadi petani di Bali, di Amerika sing perlu raga magae cara dinie, onyo nganggo mesin. Numbeg, manyi, pakaian sing kotor kene”, keto munyine murid-muride.

Sakewale, sebilang ajak ke kampong onyo nagih milu megae di tegal atau di uma. Apang nawang gen rasane dadi petani di Bali. Yan minaban tyang, murid-muride sing je nyak megae terus-terusan cara petani Bali men ya ngelah pilihan ane lenan.

Mahasiswa saking Amerika niki rauh ke Bali pang pendo a tiban, semester ganjil atau Spring mulai saking bulan Februari nganteg bulan Mei, semester genep atau Fall mulai saking bulan September nganteg bulan Desember.

Ring Bali, para mahasiswa Amerika punika melajah basa Indonesia telung jam sebilang wai lantas kelanjutan antuk melajahin budaya, sejarah, seni, sastra muah sane lian-lianan. Tongos kuliahne mekisid-kisid keawalin saking Puri Gede Kerambitan, kelanturan ke Ubud lan ke Bedulu. Derika ring Bedulu, para mahasiswa Amerikane meneng sareng keluarga Bali mangdane ipun polih ngerasanin sapunapi hidup cara Balinese. Para keluarga ngajahin ipun ngae canang, ajake ke Pura milu sareng ngodalin tur milu mase nelokin men ada anak ngaben, nganten muah sane tios-tiosan.

Sesampune melajah ring Bedulu, para mahasiswa punika ajake keliling olih guru-gurune nelokin tongos-tongos sane ngelah arti sejarah, peninggalan arkeologi, pura-pura sane wenten ring Bali.

Seliane nelokin tongos-tongos turise melali, gurune sane saking banjar Munduk Pakel, Tabanan ngajak muride ke kampong apange nawang hidup cara kampong. Di kampong muride kayeh melalung di tukade. Kendel pesan kenehne maan merdeka sekadi cara mara lekade di malu. Melalung kayeh ditukade nak sing kedadiang di Amerika, bisa ejuke ajak polisie. Gurune nyontohin kenken carane ngeles pengganggo apange tusing tepukine teken anake ane lenan. Para mahasiswa bengong ngantenan gurune, tonden tepuke ngeles penganggo saget suba mecebur di tibun tukade. Laut para mahasiswa punika niru gurune lantas mecebur ketukade, boyeje tios sekadi dedarine saking swarga mesiram ring mercapada.

“Luwung sajan asane kayeh melalung di tukade, ada anak ngintip sing?”, petakon mahasiswane.

“Sing ken ken, anak di kampong suba biasa nepukin anak melalung, gelengan ba kayeh”, pesaut gurune.

Sesampune sawatara satu jam melamlaman ring tibun tukade, tau-tau ada ane ngelah keneh pacang ngenahan atau muktiang wantah boyeje budaya sane beda ring Bali teken Amerika, sakewala bulun manusane ane beten ento janten nenten je patuh. Ipun nunden timpal-timpalne ngisiang lima soang-soang termasuk gurune, ngae lingkaran sami pada ngarep ke tengah. Di hitungan pang telu sami pada mejujuk nelokin bulune soang-soang, lantas mebriyug kedek ajak mekejang. Inggih patut pisan sekadi bawos mahasiswa punika, sami bulune lian-lian.

Nganti pelung kulitne mepelaliyan di tukade. Sesubane nyaluk sanja liyu anak teka pacang kayeh di tukade. Laut gurune nunden mahasiswa suud kayeh santukan sampun sandikala. Sepanan onyo menekan, nyemak penganggo saluke lantas mulih ke umah soang-soang.

Di wengine, para mahasiswa melajah megambel ring Bale banjare keajahin oleh sekaa Gonge. Mekejang pada girang megambel, ada ane nongosin cengceng, gupekan lan gangsa. Sekaa gong ngajahin tabuh pat madan selisir, jauk lan gamelan baris. Cepet pesan para mahasiswane nangkep gending. Gurune sareng mase megambel diyastun ipun demenan ngayahan ngigel men wenten odalan ring banjarne.

Sesampune wusan meganbel, gurune mepiuning ring mahasiswa sami.

“Benjang, iraga sami pacang polih ceramah saking Kelian Subak, ceramah bakal kewentenan di sawah, sampunang lali nyaluk penganggo sane sampun buwuk”

“Yeeeh”, suryak muride sami. Kendel kenehne bakalan maan milu megae di uma ajak petani ring kampong. Dugas nika ring sawahe nedeng numbeg, nyekjekang tur nandur bulih.

Semeng-semeng semsampune ngajeng, gurune sampun ngundang Kelian Subak mangdane nerangan indik subake sane wenten ring kampong. Para mahasiswa sampun sami nganggo pakaian sane buwuk, negen tambah para mabesik lantas mejalan ke uman Kelian Subake. Kelian Subak duweg pisan nyelasin indik subake sane wenten ring Banjar Munduk Pakel, gurune sane nerjemahin ke Bahasa Inggris mangdane para mahasiswa bisa ngerti unduk subak derika. Nenten je suwe ceramahne, lantas para mahasiswa numbeg di umane ajake Kelian Subak. Tusing je mekelo maan numbeg, suba ada ane bubul limane, batisne kena tumbeg, labuh melaib nepukin beluang tanah. Gurune kedek nepukin muridne melaib. Ipun ngubadin muride ane metatu aji don kepiduh. Laut ipun ngorahin murid-muridne apange ngejuk beluang santukan dadi goreng tur ajeng cara KFC (Kentucky Fried Chicken).

Kasurat antuk

Aryati Hunter, Academic Director for

the School for International Training (SIT) Study Abroad Program Bali